कमी दाबाचे क्षेत्र, या तारखेपासून वातावरणात बदल…तोडकर हवामान अंदाज
तोडकर यांच्या अंदाजानुसार, सध्या महाराष्ट्रात ढगाळलेलं वातावरण आणि अंधूक परिस्थिती कायम आहे. हे ढगाळलेले वातावरण काही प्रमाणात पुढेही कायम राहणार आहे आणि ते लवकर पूर्णतः नाहीसे होणार नाही. नोव्हेंबर आणि डिसेंबर महिन्यात तोडकर यांना काही प्रमाणात खराब वातावरणाचे संकेत मिळत आहेत. वेस्टर्न डिस्टर्बन्स (WD) कडून आलेली काहीशी कमजोरी दूर झाल्यामुळे महाराष्ट्रात थंडीची लाट परतणार आहे, परंतु अधूनमधून खराब हवामान आणि ढगाळलेली परिस्थिती पुढील दोन ते अडीच महिने कायम राहण्याची शक्यता आहे.
नोव्हेंबरच्या शेवटच्या आठवड्यात, २५ ते २६ तारखेदरम्यान उष्णतेची पातळी कायम राहील. या काळात धुई आणि अंधूक वातावरण कायम राहील. २७ तारखेला नागपूर, गोंदिया, चंद्रपूर, भंडारा या भागांत वातावरण काहीसे स्पष्ट होऊन उन्हाची तीव्रता पाहायला मिळेल, पण मराठवाडा, विदर्भ आणि खानदेशाच्या इतर भागांमध्ये अंधूक वातावरण कायम राहील. २८ तारखेला वातावरण बहुतांशी स्वच्छ आणि सूर्यप्रकाशित होईल, मात्र खानदेशातील धुळे, जळगाव यांसारख्या काही भागांमध्ये ढगाळलेले वातावरण टिकून राहील.
पुढे २९ तारखेला वाऱ्याचा वेग वाढून ती कडक थंडी घेऊन येतील. याच काळात बंगालच्या उपसागरात आणि अरबी समुद्रात कमी दाबाचे क्षेत्र सक्रिय होत असल्याने ३० तारखेपासून छत्रपती संभाजीनगर, जालना, सोलापूर आणि पश्चिम महाराष्ट्र या भागांमध्ये ढगाळलेल्या हवामानाची परिस्थिती पुन्हा वाढेल. (तोडकर)
डिसेंबर महिन्याची सुरुवात १ आणि २ तारखेला सर्वाधिक ढगाळ वातावरणाने होईल. संपूर्ण डिसेंबर महिन्यात ‘चार दिवस स्वच्छ, चार दिवस ढगाळले’ अशा प्रकारे वातावरणाचे चढ-उतार कायम राहतील. तोडकर यांच्या अंदाजानुसार, डिसेंबरच्या पहिल्या आठवड्यात महाराष्ट्रात मोठी पावसाची शक्यता नाही; पाऊस प्रामुख्याने दक्षिण भारतात (तमिळनाडू, केरळ, आंध्र प्रदेश) केंद्रित राहील. थंडी ४ तारखेला अति तीव्र होऊन ६ ते ७ तारखेपर्यंत ही कडाक्याची थंडी कायम राहील. त्यानंतर ती लगेच कमी होऊन ८ किंवा ९ तारखेपासून पुन्हा ढगाळलेलं वातावरण सक्रिय होईल, म्हणजेच सुमारे आठ दिवस थंडी तर आठ दिवस ढगाळ वातावरण असा क्रम चालू राहील.
हवामानातील या सततच्या बदलांमुळे शेतीवर परिणाम होणार आहे. कवळ्या पिकांवर, विशेषतः कांदा रोप या पिकांवर ढगाळ हवामानामुळे वारंवार परिणाम होऊन फवारणीचा खर्च वाढेल आणि करपा पडण्याची शक्यता राहील. याव्यतिरिक्त, द्राक्ष उत्पादकांसाठी देखील हे वर्ष थोडे किचकट आणि खराब राहू शकते, असा इशारा तोडकर यांनी दिला आहे.
