चक्रीवादळामुळे श्रीलंकेत महाविनाश! पूर, पाऊस आणि भूस्खलनाने हाहाकार ; शांत आणि निसर्गरम्य बेटराष्ट्र असलेल्या श्रीलंकेत सध्या निसर्गाने रौद्ररूप धारण केले आहे. मुसळधार पाऊस, महापूर आणि भूस्खलनामुळे संपूर्ण देशात हाहाकार माजला आहे, ज्यामुळे जनजीवन पूर्णपणे विस्कळीत झाले आहे. या महाविनाशामध्ये आत्तापर्यंत ५६ हून अधिक लोकांचा मृत्यू झाला आहे, ६० पेक्षा जास्त घरे उद्ध्वस्त झाली आहेत, तर ६० नागरिक अजूनही बेपत्ता आहेत. हिंद महासागरातील हे छोटेसे द्वीपराष्ट्र आज एका महाकाय संकटाशी झुंजत आहे.
परिस्थिती विशेषतः मध्यवर्ती पर्वतीय प्रदेशात अधिक गंभीर आहे. एकेकाळी हिरवीगार चहाच्या पट्ट्यांसाठी ओळखल्या जाणाऱ्या बादला आणि नुवारा एलिया यांसारख्या भागांमध्ये आता चिखलाचे ढिगारे आणि वेदनांचे पडसाद दिसत आहेत. डोंगर कडा कोसळून अनेक घरे क्षणात चिखलाखाली गाडली गेली आहेत.
अनेक गावांचा बाहेरील जगाशी संपर्क पूर्णपणे तुटला आहे, कारण भूस्खलनामुळे रस्ते बंद झाले असून रेल्वे मार्ग ढिगाऱ्याखाली आले आहेत. राजधानी कोलंबो आणि हिल कंट्रीची कनेक्टिव्हिटी जवळजवळ कोसळली आहे. नद्या आणि जलाशयांनी धोक्याची पातळी ओलांडल्यामुळे सरकारने सर्व सरकारी कार्यालये आणि शाळा बंद ठेवण्याचे आदेश दिले आहेत आणि लोकांना घराबाहेर न पडण्याचा कडक इशाराही देण्यात आला आहे.
या संकटात बचाव कार्य दले जीवाची बाजी लावत आहेत. नौदल बोटी पुराच्या पाण्यात पुढे सरकत आहेत आणि हेलिकॉप्टर छतावर अडकलेल्या लोकांना बाहेर काढत आहेत. श्रीलंकेच्या हवाई दलाने अनुराधापूर जिल्ह्यातील अवकाना येथील एक थरारक बचावकार्य यशस्वी केले. उंच नारळाच्या झाडावर अडकलेल्या एका व्यक्तीला त्यांनी बेल हेलिकॉप्टरच्या मदतीने, मृत्यूच्या दारातून परत आणले. बचाव कार्याचा हा थरार, संघर्ष आणि अविस्मरणीय क्षण हवाई दलाच्या कौशल्याची कमाल दर्शवतो. अनेक गावे अजूनही पाण्याखाली आहेत आणि बचाव कार्य अविरतपणे सुरू आहे.
सध्या श्रीलंकेतील परिस्थिती संघर्ष, विनाश आणि त्याचबरोबर प्रशासन व बचाव कार्य दलांचे अविरत प्रयत्न अशी आहे. मुसळधार पावसाच्या सलग हल्ल्याने रस्ते, गावे आणि शेतजमिनी सर्वकाही प्रचंड पुराच्या विळख्यात सापडले आहे. पुढील काही तास आणि दिवस या देशाच्या भवितव्यासाठी अत्यंत निर्णायक ठरणार आहेत. या महापुरातून हा देश लवकरात लवकर सावरो, हीच अपेक्षा आहे.
व्हिडिओ लिंक: http://www.youtube.com/watch?v=C8nr1EafNlM
